Mbrëmje historike për tenisin italian dhe për Jannik Sinner. Numri një i botës triumfoi në Internazionali BNL d’Italia, duke mposhtur në finale norvegjezin Casper Ruud me rezultatin 6-4, 6-4, pas një ore e 45 minutash lojë spektakolare.
Një sukses që konfirmon dominimin absolut të Sinner në tenisin botëror. Për italianin ky është titulli i nëntë Masters 1000 në karrierë dhe i gjashti radhazi, një rekord i jashtëzakonshëm që e fut edhe më thellë në historinë e sportit.
Ndeshja nisi me vështirësi për Sinner, i cili humbi menjëherë shërbimin dhe u gjend nën presion nga Ruud. Por reagimi i kampionit italian ishte i menjëhershëm: kundër-break, ritëm më i lartë dhe goditje gjithnjë e më precize. Në momentin vendimtar të setit të parë, në rezultatin 4-4, italiani i mori sërish shërbimin kundërshtarit dhe mbylli setin 6-4.
Edhe në setin e dytë Sinner tregoi superioritet. Një tjetër break në fillim i dha kontrollin e sfidës, ndërsa Ruud provoi të rikthehej në lojë pa arritur të ndryshonte fatin e finales. Në game-in e fundit, numri një i botës ruajti qetësinë dhe vulosi triumfin me një tjetër 6-4.
Ky sukses ka një domethënie të veçantë për sportin italian: pas 50 vitesh, një italian rikthehet të fitojë turneun e Romës, duke pasuar legjendën Adriano Panatta.
Në renditjen ATP, Sinner kryeson me diferencë të madhe ndaj rivalit spanjoll Carlos Alcaraz, i cili po përballet me probleme fizike dhe rrezikon të mungojë në Roland Garros. Gjithsesi pavarësisht rezultatit në Roland Garros, Sinner do të ruajë primatin në renditjen e përgjithshme.
and then