Vrasja e efektivit Santiago Malko, Apeli i Posaçëm lë në fuqi dënimin me 28 vite burg për Ilir Selmanin

Gjykata e Posaçme e Apelit për Korrupsionin dhe Krimin e Organizuar vendosi sot të lërë në fuqi vendimin për dënimin me 28 vite burg të Ilir Selmanit, i cili u shpall fajtor për vrasjen e ish-policit Santiago Malko. Ngjarja ndodhi në gusht të vitit 2019 në Tiranë.

Sipas njoftimit të Gjykatës së Posaçme kundër Korrupsionit dhe Krimit të Organizuar, trupa gjykuese, e përbërë nga gjyqtarët e caktuar nga Këshilli i Lartë Gjyqësor, Dritan Hasani (kryesues), Miranda Andoni (anëtare) dhe Arbër Çela (anëtar), sot, më 17.07.2026, shpalli vendimin mbi çështjen penale nr. 23, të regjistruar më 16.02.2026. Kjo çështje u regjistrua pas prishjes nga Gjykata e Lartë të vendimit nr. 48, datë 16.11.2023, të Gjykatës së Posaçme të Apelit për Korrupsionin dhe Krimin e Organizuar dhe kthimit të saj për rishqyrtim me një tjetër trup gjykues, mbi ankimin e paraqitur nga i pandehuri Ilir Selmani kundër vendimit nr. 28, datë 03.05.2023, të Gjykatës së Posaçme të Shkallës së Parë për Korrupsionin dhe Krimin e Organizuar.

Gjykata e Posaçme e Apelit për Korrupsionin dhe Krimin e Organizuar vendosi lënien në fuqi të vendimit nr. 28, datë 03.05.2023, të Gjykatës së Posaçme të Shkallës së Parë për Korrupsionin dhe Krimin e Organizuar, për të pandehurin Ilir Selmani.

Kundër këtij vendimi mund të bëhet rekurs në Gjykatën e Lartë brenda 45 ditëve, duke filluar nga dita e nesërme e njoftimit të vendimit. Vendimi u shpall në Tiranë, sot, më 17.07.2026.

Çështja u rigjykua në Apelin e Posaçëm pas vendimit të mëparshëm të Gjykatës së Lartë. Me vendimin e dhënë, Ilir Selmani do të rikthehet në qeli për të vuajtur dënimin me 28 vite burg, i cili do të kryhet në një burg të sigurisë së lartë.

Kujtojmë se Gjykata e Posaçme e Apelit për Korrupsionin dhe Krimin e Organizuar vendosi më 19 qershor, ndryshimin e masës së sigurisë për Ilir Selmanin. Apeli i GJKKO-së caktoi masën “arrest në shtëpi”, duke urdhëruar që ai të qëndrojë në banesën e tij në Tiranë nën mbikëqyrje të policisë gjyqësore.

Selmani ishte dënuar më 16 nëntor 2023 nga Gjykata e Posaçme e Apelit me 28 vite burg për vrasjen e ish-policit, ngjarje e ndodhur më 27 gusht 2019 në rrugën “Xhanfize Keko” në Tiranë.

Sipas vendimit të atëhershëm të gjykatës, Selmani (pjesë e grupit të njohur si “Klani Duka”), së bashku me një person tjetër kishte mbajtur nën vëzhgim Malkon para vrasjes.