Meta ka hedhur një bombë të re mbi planin e Bashkimit Evropian për të rregulluar modelet e inteligjencës artificiale, duke njoftuar sot se nuk do ta nënshkruajë kodin e sjelljes së BE-së.
Në një koment të bërë të premten, drejtori i Metës për çështjet ndërkombëtare, Joel Kaplan – i cituar nga Politico – tha se kodi “prezanton një numër pasigurish ligjore për zhvilluesit e modeleve, si dhe masa që shkojnë shumë përtej fushëveprimit të ligjit të inteligjencës artificiale”.
Ky qëndrim e bën Metën kompaninë e parë të madhe të teknologjisë, që nuk e nënshkruan kodin e sjelljes së BE-së për inteligjencën artificiale.
Kontroll më i rreptë për kompanitë që nuk nënshkruajnë
Kodi i sjelljes u publikua javën e kaluar dhe është hapi më i fundit i Komisionit Evropian për të kufizuar rreziqet që modelet e inteligjencës artificiale – të tilla si ChatGPT i OpenAI ose Grok i X – paraqesin për përdoruesit.
Në thelb, kodi i sjelljes i BE-së është një përpjekje për të siguruar që kompanitë e mëdha që përdorin inteligjencën artificiale të ndjekin rregullat e BE-së, pa pasur nevojë për hetime për secilën prej tyre individualisht.
Kompanitë që vendosin të mos nënshkruajnë do t’i nënshtrohen një shqyrtimi më të rreptë nga Komisioni gjatë zbatimit të ligjit për inteligjencën artificiale.
Kompanitë reagojnë ndaj kodit të etikës
Por kodi është përballur me muaj të tërë presioni të fortë nga industria e teknologjisë.
Kaplan përmendi të premten një letër të nënshkruar në fillim të korrikut nga më shumë se 40 kompani kryesore evropiane, përfshirë Bosch dhe SAP, duke i bërë thirrje Komisionit të pezullojë zbatimin e ligjit për inteligjencën artificiale.
Meta “ndan shqetësimet e shprehura nga këto biznese se kjo ndërhyrje e tepërt do të pengojë zhvillimin dhe zbatimin e modeleve inovative të IA-së në Evropë dhe do të pengojë kompanitë evropiane që duan të ndërtojnë biznese bazuar në këto modele”, tha Kaplan.
Në shkurt, Google lëshoi gjithashtu një paralajmërim të ashpër se ligji i BE-së për IA-në rrezikon të dëmtojë inovacionin dhe rritjen në Evropë, duke e quajtur kodin e sjelljes “një hap në drejtimin e gabuar”.
Arena e Lajmit
and then