“Përballje titanësh”, Italia sfidon “gjelat” e Zizu, mungesa “big” në “San Siro”

E gjithë vëmendja në futbollin europian është përqendruar në “San Siro”, aty ku mbrëmjen e sotme Italia dhe Franca do të përballen në një supersfidë të vlefshme për Ligën e Kombeve. Pas barazimit 1-1 në ndeshjen e parë në Paris, të dyja skuadrat kërkojnë fitoren, me të kaltrit që synojnë të sigurojnë një vend në çerekfinale. Për këtë, Italia duhet të mposhtë Francën dhe të shpresojë në një humbje të Belgjikës përballë Turqisë.

Pavarësisht rëndësisë së sfidës, Franca do të zbresë në fushë me disa mungesa të rëndësishme, ku spikasin Kylian Mbappe, Ousmane Dembele dhe Marcus Thuram. Megjithatë, kampionët francezë kanë alternativa të shumta në dispozicion dhe mbeten një kundërshtar tepër i rrezikshëm.

Në kampin italian pritet një formacion i ngjashëm me atë të ndeshjes së parë, ndërsa rikthimi i Barellës në mesfushë dhe aktivizimi i Cambiaghit në sulm janë dy nga ndryshimet e mundshme. Në “San Siro” pritet një atmosferë e zjarrtë, me rreth 62 mijë tifozë që do të mbështesin të kaltrit në këtë sfidë vendimtare.

Në prag të ndeshjes, trajneri i Italisë, Roberto Mancini, theksoi se skuadra e tij ka bërë progres dhe se objektivi është të zhvillojë një tjetër paraqitje pozitive, por këtë herë me synimin e vetëm për të fituar. “Mentaliteti ynë duhet të jetë gjithmonë të luajmë për të fituar. Pavarësisht kësaj, me shumë mundësi kualifikimi do të vendoset në Bruksel, pasi besoj se Belgjika do të marrë një rezultat pozitiv në Turqi..Formacioni? kam ende disa dryshime”, theksoi tekniku i “azzurrëve”.

Nga ana tjetër, tekniku francez Zinedine Zidane konfirmoi mungesën e Mbappes për shkak të një problemi fizik, duke garantuar se Franca do të zbresë në fushë me një formacion konkurrues. Ai vlerësoi gjithashtu forcën e Italisë, veçanërisht organizimin e saj në fazën mbrojtëse. “Vështirësia lidhet gjithmonë me mungesën e lojtarëve që nuk mund të aktivizohen, pasi kjo është diçka që nuk i pëlqen asnjë trajneri. Megjithatë, është pjesë e futbollit dhe duhet ta pranojmë. Në ndeshjen e parë patëm një mbrëmje të vështirë, sepse e dimë që Italia, kur dëshiron të zhvillojë një ndeshje të mirë, arrin ta bëjë këtë, veçanërisht në aspektin mbrojtës..”, theksoi Zizu.